ছিপাঝাৰৰ গৰুখুঁটি কৃষি প্রকল্পত উপস্থিত হৈ আজি পঞ্চায়ত, গ্রামোন্নয়ন আৰু জনস্বাস্থ্য কাৰিকৰী বিভাগৰ মন্ত্রী ৰঞ্জিত দাসে প্রকল্পস্থলীত গ্রামোন্নয়ন বিভাগৰ জৰিয়তে নির্মাণ কৰা মৎস্য উৎপাদন প্রকল্পৰ পুখুৰী খনন আঁচনিৰ শুভাৰম্ভ কৰে৷ মহাত্মা গান্ধী ৰাষ্ট্রীয় নিয়োগ নিশ্চিত আঞ্চৰ অধীনত ৩২ লক্ষ ৫৫ হাজাৰ টকা ব্যয় সাপেক্ষ ‘মীন পালনৰ বাবে পুখুৰী খনন’ শীর্ষক এই আঁচনিৰ শুভাৰম্ভ কৰে মন্ত্রীগৰাকীয়ে৷ আনহাতে গ্রামোন্নয়ন বিভাগৰ জৰিয়তে গৰুখুঁটি প্রকল্পত স্থাপন কৰা গোশালা, গাহৰি গঁৰাল, দুগ্ধ উৎপাদন কেন্দ্রৰ ওখ ভেটি, কৃষি বান্ধ নির্মাণ, বয়ন শিল্প কেন্দ্র নির্মাণ আদি আঁচনিসমূহো পর্যবেক্ষণ কৰে মন্ত্রীগৰাকীয়ে৷ ইফালে প্রকল্পস্থলীত জনস্বাস্থ্য আৰু কাৰিকৰী বিভাগৰ জৰিয়তে গোবৰৰ পৰা গেছ প্রস্তুত কৰা ‘গোবর্ধন’ শীর্ষক এখন আঁচনি ৰূপায়ণ কৰা হ’ব বুলিও তেওঁ মন্তব্য কৰে৷ বিশেষকৈ গৰুখুঁটি কৃষি প্রকল্পৰ গোশালাৰ গৰুৰ গোবৰৰ জৰিয়তে গেছ আহৰণ কৰি সেই গেছ প্রকল্পৰ বিভিন্ন কাম–কাজত ব্যৱহাৰ কৰিব পাৰিব বুলিও মন্ত্রীগৰাকীয়ে প্রকাশ কৰে৷ মুখ্যমন্ত্রীৰ ভ্রমণৰ পিছৰে পৰা প্রকল্পৰ কাম–কাজ আৰু ক্ষিপ্রগতিত আগবাঢ়িব বুলিও আশা কৰে মন্ত্রীগৰাকীয়ে৷
আনহাতে আজি মুখ্যমন্ত্রী ড০ হিমন্ত বিশ্ব শর্মা গৰুখুঁটি কৃষি প্রকল্পত উপস্থিত হোৱাৰ পিছত প্রকল্পই এটা নতুন গতি ল’ব বুলিও প্রকাশ কৰে মন্ত্রী দাসে৷ মন্ত্রীগৰাকীৰ আজিৰ কার্যসূচীত উপস্থিত থাকে ছিপাঝাৰ সমষ্টিৰ বিধায়ক তথা প্রকল্পৰ কৃষি সমিতিৰ সদস্য ড০ পৰমানন্দ ৰাজবংশী৷ ইফালে মুখ্যমন্ত্রীৰ আগমনক কেন্দ্র কৰি গৰুখুঁটি কৃষি প্রকল্পত দেখা গৈছে ব্যাপক তৎপৰতা৷ নিৰাপত্তা ব্যৱস্থা কটকটীয়া কৰি তোলাৰ লগতে মুখ্যমন্ত্রীয়ে শুভাৰম্ভ কৰিবলগীয়া আঁচনিসমূহৰ বাবেও বিভাগে বিভাগে প্রস্তুতি অব্যাহত ৰাখিছে৷ সমান্তৰালভাৱে মুখ্যমন্ত্রীৰ আগমনক কেন্দ্র কৰি উৎসাহিত হৈ পৰিছে প্রকল্পত নিয়োজিত যুৱক–যুৱতীসকল৷
মুখ্যমন্ত্রীগৰাকীয়ে প্রথমেই ঐতিহাসিক ধলপুৰ শিৱ মন্দিৰত আশিস লৈহে প্রকল্পস্থলীত উপস্থিত হ’ব৷ প্রকল্পস্থলীত অস্থায়ীভাৱে নির্মাণ কৰা নামঘৰৰ গৃহ নির্মাণৰ শুভাৰম্ভ কৰি সমীপতে নির্মাণ কৰিব লগা শ্বহীদ স্মৃতি উদ্যানৰো নির্মাণৰ শুভাৰম্ভ কৰিব৷ পৰৱর্তী সময়ত গোশালা, বয়ন শিল্প কেন্দ্র, কৃষি বিভাগৰ কার্যালয়, প্রকল্প সংযোগী পকী পথ নির্মাণৰ শুভাৰম্ভকে ধৰি কেইবাটাও কার্যসূচীত অংশ ল’ব৷ এই মাৰাথন কার্যসূচীৰ মাজতে মুখ্যমন্ত্রীগৰাকীয়ে প্রকল্পত নিয়োজিত প্রায় সাতশ যুৱক–যুৱতীৰ সৈতে একেলগে বহি পুৱা জলপান গ্রহণ কৰাৰ লগতে প্রকল্পস্থলীতে দুপৰীয়াৰ আহাৰো গ্রহণ কৰিব৷ তদুপৰি ৰাইজক সম্বোধন কৰাৰ পূর্বেই সম্পূর্ণ আছুতীয়াকৈ প্রকল্পৰ যুৱক–যুৱতীসকলৰ্ লগত এক অন্তৰংগ আলাপ অনুষ্ঠানতো অংশ ল’ব৷ যাৰ বাবে মুখ্যমন্ত্রীগৰাকীক একেবাৰে ওচৰতে লগ পোৱাৰ আশাৰে উৎসুক হৈ পৰিছে প্রকল্পৰ লগত জড়িত লোকসকল৷ মুখ্যমন্ত্রীগৰাকীক কেৱল অসমীয়া পিঠা–পনাৰে আপ্যায়ন কৰাৰ লগতে দুপৰীয়াৰ নিৰামিষ ভাতসাঁজত প্রকল্পত উৎপাদিত জৈৱিক শাক–পাচলিৰ উপৰি অসমীয়া খাৰলি, ভেদাইলতাৰ চাটনি আদিও থাকিব৷
