শিৱসাগৰ :যান বাহনৰ কৰ–কাটলৰ বাবদ সংগৃহীত বৃহৎ পৰিমাণৰ ধন কোষাগাৰত জমা নিদি আত্মসাৎ কৰাক লৈ সমগ্ৰ শিৱসাগৰতে সৃষ্টি হৈছে প্ৰতিক্ৰিয়াৰ।শিৱসাগৰ জিলা পৰিবহণ বিভাগৰ কাৰ্যালয়ত সংঘটিত হৈছে ২৭ লাখ টকাৰ এক বৃহৎ কেলেংকাৰী। যান বাহনৰ কৰ–কাটলৰ বাবদ সংগৃহীত বৃহৎ পৰিমাণৰ ধন কোষাগাৰত জমা নিদি আত্মসাৎ কৰাক লৈ সমগ্ৰ শিৱসাগৰতে সৃষ্টি হৈছে প্ৰতিক্ৰিয়াৰ।
বিগত ২০১৯ বৰ্ষৰ ৭ ডিচেম্বৰ আৰু ৩০ ডিচেম্বৰত সংঘটিত কেলেংকাৰীৰ সন্দৰ্ভত ৬টা মাহৰ অন্তত পৰিবহণ আয়ুক্তই নিলম্বন কৰিছে শিৱসাগৰ পৰিবহণ বিভাগৰ এজন গাণনিকক৷ গাণনিকজনৰ নাম চন্দ্ৰশেখৰ মল্লিক।কিন্তু কাৰ্যালয়টোৰ একাংশ কৰ্মচাৰীয়ে নতুনকৈ যোগদান কৰা চন্দ্ৰশেখৰ মল্লিক নামৰ নিলম্বিত কৰ্মচাৰীজনক বলিৰ পঠা সজাইছে বুলি গুৰুতৰ অভিযোগ উত্থাপন কৰিছে।
আন নালাগে এই বৃহত্ কেলেংকাৰীৰ সৈতে এগৰাকী অৱসৰপ্ৰাপ্ত কৰ্মচাৰীৰ লগতে দুজন চতুৰ্থ বৰ্গৰ কৰ্মচাৰী জড়িত থকাৰ অভিযোগ উত্থাপন হোৱাৰ সময়তেই কেলেংকাৰীৰ তদন্তৰ বাবে কাৰ্যালয়টোত উপস্থিত হয়হি দুজনীয়া অনুসন্ধানকাৰীৰ দল।গুৱাহাটীস্থিত ৰাজ্যৰ পৰিবহণ আয়ুক্ত কাৰ্যালয়ৰ পৰিসংখ্যা বিভাগৰ পৰিদৰ্শক অৱণী কলিতাৰ নেতৃত্বত অহা দলটোৱে ইতিমধ্যে কাৰ্যালয়টোৰ সকলোধৰণৰ নথি তন্ন তন্নকৈ পৰীক্ষা কৰিছে।
আনহাতে, এই কেলেংকাৰী নাম সাঙোৰ খাইছে অৱসৰপ্ৰাপ্ত গাণনিক জিতু চেতিয়াৰ। যি অৱসৰৰ পিছতো চন্দ্ৰশেখৰ মল্লিকক কাম শিকাবলৈ কাৰ্যালয়লৈ আহি আছিল। পিছে ২৭ লাখ টকা কোনে আত্মসাৎ কৰিলে সেয়া পোহৰলৈ আহিব তদন্তৰ পিছতহে।
