গুৱাহাটী : ভাষাবিদ, সাহিত্যাচার্য, শিক্ষাবিদ ড০ গোলোক চন্দ্র গোস্বামী আৰু নাই৷ অসমীয়া ভাষা আৰু সাহিত্যৰ চিৰন্তন প্রৱাহিত সুঁতি বোৱাই নিয়াত অধ্যয়নশীলতাৰে আজীৱন অপৰিসীম সেৱা আগবঢ়োৱা গোলোক চন্দ্র গোস্বামীদেৱে আজি পুৱা এখন ব্যক্তিগত চিকিৎসালয়ত ৯৭ বছৰ বয়সত শেষনিশ্বাস ত্যাগ কৰে৷ আবেলি নৱগ্রহ শ্মশানত ৰাজ্যিক মর্যাদাৰে ভাষাবিজ্ঞানীগৰাকীৰ শেষকৃত্য সম্পন্ন কৰা হয়৷ বার্ধক্যজনিত কাৰণত ইহলীলা সম্বৰণ কৰা গোলোক চন্দ্র গোস্বামীৰ শূন্যতা অসমীয়া ভাষা-সাহিত্যৰ জগতখনত সদায় অপূৰণীয় ক্ষতি হৈ ৰ’ব৷
উল্লেখযোগ্য যে অবিভক্ত নগাঁও জিলাৰ (বর্তমান মৰিগাঁও জিলাৰ) অন্তর্গত মায়াং মৌজাৰ দৈপৰা সত্রত ১৯২৩ চনত গোলোক চন্দ্র গোস্বামীৰ জন্ম হৈছিল৷ পিতৃ পৰমানন্দ দেৱ গোস্বামী আৰু মাতৃ দময়ন্তী দেৱী৷ জাগী হাইস্কুলত দশম শ্রেণীত পঢ়ি থাকোঁতে ১৯৪২ চনত স্বাধীনতা আন্দোলনত গোলোক চন্দ্র গোস্বামী জঁপিয়াই পৰিছিল৷ পশ্চিম নগাঁও চার্কুলৰ শান্তিসেনাৰ সহঃ অধিনায়ক হিচাপে যোগ দিয়াত এটা শিক্ষা বর্ষৰ পৰা গোস্বামী বঞ্চিত হৈছিল৷ ১৯৪৪ চনত ৰহা হাইস্কুলৰ পৰা প্রৱেশিকা পৰীক্ষাত ষ্টাৰ নম্বৰসহ প্রথম বিভাগত উত্তীর্ণ হয়৷
১৯৪৮ চনত কটন কলেজৰ পৰা কলা শাখাত স্নাতক ডিগ্রী অর্জনৰ পাছত এটা বছৰ গুৱাহাটীৰ কামৰূপ একাডেমিত শিক্ষকতা কৰিছিল৷ ১৯৫৩ চনত গুৱাহাটী বিশ্ববিদ্যালয়ৰ পৰা অসমীয়া ভাষা বিষয়ত কৃতিত্বৰে স্নাতকোত্তৰ ডিগ্রী অর্জন কৰা গোস্বামীয়ে ইয়াৰ পূর্বে দিল্লীৰ জামিয়া মিলিয়া ইছলামিয়া বিশ্ববিদ্যালয়ৰ পৰা বেছিক এডুকেশ্যনৰ স্নাতকোত্তৰ প্রশিক্ষণ লাভ কৰিছিল৷ গুৱাহাটী বিশ্ববিদ্যালয়ত অধ্যয়নৰত অৱস্থাত গোস্বামীয়ে ‘নতুন অসমীয়া’ কাকতত জ্যেষ্ঠ উপ-সম্পাদক হিচাপেও কার্যনির্বাহ কৰিছিল৷
১৯৫৪ চনত গোলোক চন্দ্র গোস্বামী গুৱাহাটী বিশ্ববিদ্যালয়ৰ অসমীয়া ভাষা বিষয়ত প্রবক্তা হিচাপে যোগদান কৰে৷ বিশ্ববিদ্যালয়ত প্রথম অৱস্থাত গোস্বামী শিক্ষা বিষয়ৰ প্রতিহে আকর্ষিত আছিল যদিও অধ্যাপক বাণীকান্ত কাকতি আৰু বিৰিঞ্চি কুমাৰ বৰুৱাই গোস্বামীক অসমীয়া (ভাষা-বিজ্ঞান) বিষয়টো ল’বলৈ বাধ্য কৰোৱাত এই বিষয়ৰ ছাত্র হৈ পৰে৷ এই কাৰণতে তেওঁৰ জীৱনযাত্রা সলনি হৈ পৰে৷ ১৯৫৫ চনৰ পৰা ১৯৫৬ চনৰ শেষভাগলৈ তেওঁ পুনেৰ ডেক্কান কলেজত ভাষা-বিজ্ঞানৰ গৱেষক ছাত্র হিচাপে প্রশিক্ষণ লয়৷
১৯৫৬ চনতেই গোলোক চন্দ্র গোস্বামীয়ে কেলিফর্নিয়া বিশ্ববিদ্যালয়ৰ বার্কলি টোলত ভাষা-বিজ্ঞান বিভাগত যোগদান কৰে৷ ১৯৬৭ চনত ড০ গোলোক চন্দ্র গোস্বামী গুৱাহাটী বিশ্ববিদ্যালয়ৰ অসমীয়া বিভাগৰ ৰীডাৰ আৰু ১৯৭৮ চনত বিভাগটোৰ মুৰববী হিচাপে কার্যভাৰ গ্রহণ কৰে৷ ১৯৮১ চনত এই বিভাগৰ জ্যেষ্ঠ প্রাধ্যাপক আৰু মুৰববী হৈ ১৯৮৫ চনত অৱসৰ গ্রহণ কৰে৷ ড০ বাণীকান্ত কাকতিৰ আদর্শেৰে অনুপ্রাণিত গোস্বামীয়ে হাইস্কুলত পঢ়ি থাকোঁতেই ‘পাৰিজাত’ নামৰ হাতেলিখা আলোচনীত সাহিত্য চর্ কৰিছিল৷ গোলোক চন্দ্র গোস্বামীয়ে ভাষা-সম্পর্কীয় কেইবাখনো অমূল্য গ্রন্থ প্রণয়ন কৰি অসমীয়া ভাষা-সাহিত্যলৈ উল্লেখনীয় অৱদান আগবঢ়াইছে৷
গোস্বামীদেৱৰ ভাষাতত্ত্বৰ প্রকাশিত গ্রন্থসমূহ হ’ল– ধবনিবিজ্ঞানৰ ভূমিকা (১৯৬৬), অসমীয়া বর্ণ-প্রকাশ (১৯৬৯), অসমীয়া গোলক ব্যাকৰণ (১৯৭২), অসমীয়া আখৰ জোঁটনি (১৯৭২), অসমীয়া ব্যাকৰণৰ মৌলিক বিচাৰ (১৯৮৭), ভাষা-ভাষনিকা (১৯৯২)৷ সম্পাদনা গ্রন্থসমূহ হ’ল সুধর্মাৰ উপাখ্যান (পদ্মাৱতী দেৱী ফুকননী), ধর্মনাথ বৰঠাকুৰ ঃ শতবর্ষৰ স্মৃতি-অর্ঘয, ভাৰতৰ মুক্তিযুদ্ধত পাণবাৰীত ৰে’ল গাড়ী বগৰোৱাৰ ইতিবৃত্ত (মহানন্দ দেৱ গোস্বামী), আছামিজ ইটছ ফ’র্মেশ্যন এণ্ড ডেভেলপমেণ্ট (ড০ বাণীকান্ত কাকতি)৷
এন আছামিজ গ্রামাৰ আদি৷ তিনিখন অভিধান ক্রমে হিন্দী-অসমীয়া-ইংৰাজী ত্রিভাষী অভিধান (১৯৮৫), হিন্দী-অসমীয়া লঘুকোষ (১৯৮৫) আৰু ভাৰতীয় ভাষাকোষ (১৯৮৫) প্রণয়ন কৰিও গোস্বামীয়ে অনবদ্য অৰিহণা আগবঢ়াইছে৷ ড০ গোলোক চন্দ্র গোস্বামীৰ আন কেইখনমান উল্লেখযোগ্য গ্রন্থ হ’ল– মায়া প্রসংগ, ঠাকুৰ হৰিদাস চৰিত, আনন্দ সাগৰ শ্রীকৃষ্ণ পৰমার্থ কথা৷ অনুবাদ গ্রন্থ ক্রমে– ঈশ্বৰৰ বাণী, ব্যাকৰণ-মহাভাষ্য, পস্পশক্তিক (মহর্ষি পতঞ্জলী)৷ অসমীয়া ভাষাৰ বাবে অহৰহ কাম কৰি যোৱা ড০ গোস্বামীক বিভিন্ন অনুষ্ঠান-প্রতিষ্ঠানে সন্মান, সম্বর্ধনা আৰু উপাধি প্রদান কৰিছে৷
অসম ভাষা-বিজ্ঞান সমিতিয়ে ‘ভাষাচার্য’ আৰু অসম সাহিত্য সভাই গোস্বামীক ‘সাহিত্যাচার্য’ সন্মানেৰে বিভূষিত কৰিছে৷ ২০০১ চনত আনন্দৰাম বৰুৱা ভাষা কলা-সংস্কৃতি সংস্থাই আনন্দৰাম বৰুৱা বঁটাৰে সন্মানিত কৰে৷ সাত ভনী মিত্র মঞ্চই ‘ভাষাগুৰু’ উপাধি প্রদান কৰে ২০০৮ চনত৷ গুৱাহাটী বিশ্ববিদ্যালয়ে ২০১০ চনৰ ২৩সংখ্যক সমাৱর্তনত ‘প্রফেছৰ এমেৰিটাছ’ বঁটাৰে সন্মানিত কৰে গোস্বামীদেৱক৷ ড০ গোস্বামীৰ মহাপ্রয়াণৰ বাতৰি পাই অসম সাহিত্য সভাৰ সভাপতি পৰমানন্দ ৰাজবংশী, মুখ্যমন্ত্রীৰ মিডিয়া উপদেষ্টা হূষীকেশ গোস্বামীকে ধৰি বহু বিশিষ্ট ব্যক্তিয়ে ঘৰলৈ গৈ শেষ শ্রদ্ধাঞ্জলি জ্ঞাপন কৰে৷
