গুৱাহাটী : নাগৰিকত্ব সংশোধনী বিধেয়ক গৃহীত কৰিবলৈ বিজেপিৰ ৰাষ্ট্রীয় কার্যনির্বাহকে গ্রহণ কৰা প্রস্তাৱৰ বিৰুদ্ধে সৰৱ হৈছে কৃষক মুক্তি সংগ্রাম সমিতি৷ কৃষক সংগঠনটোৱে বিধেয়কখনৰ বিৰোধিতা কৰা অগপক মিত্রজোঁট চৰকাৰৰ পৰা ওলাই আহিবলৈয়ো দাবী জনাইছে৷
নাগৰিকত্ব সংশোধনী বিধেয়কৰ বিৰুদ্ধে আজি কৃষক মুক্তি সংগ্রাম সমিতিৰ লগতে অসম জাতীয়তাবাদী যুৱ-ছাত্র পৰিষদে দীঘলীপুখুৰীৰ পাৰত সমবেত হৈ প্রতিবাদী শোভাযাত্রা উলিয়ায়৷ ৫ শতাধিক প্রতিবাদকাৰীয়ে বিজেপিৰ ৰাষ্ট্রীয় কার্যনির্বাহকত হিন্দু বাংলাদেশীক নাগৰিকত্ব দিয়াৰ প্রস্তাৱৰ বিৰুদ্ধে জাঙুৰ খাই উঠে৷ দীঘলীপুখুৰীৰ পাৰৰ প্রতিবাদী সভাত কৃষক নেতা অখিল গগৈয়ে কয় যে মুখ্যমন্ত্রী সর্বানন্দ সোণোৱালক সন্মুখত বহুৱাই নাগৰিকত্ব সংশোধনী বিধেয়কৰ সপক্ষে প্রস্তাৱ গ্রহণ কৰিছিল৷
অথচ মুখ্যমন্ত্রী সোণোৱালে ৰাজ্যৰ সাংবাদিক, সম্পাদকসকলৰ সৈতে হোৱা বৈঠকত ‘মই যদি অসমৰ ৰাইজৰ স্বার্থ সুৰক্ষিত কৰিব নোৱাৰোঁ, তেন্তে মুখ্যমন্ত্রী হৈ থকাৰ অর্থই বা কি’ বুলি মন্তব্য কৰিছিল৷ তদুপৰি ‘মই অসমৰ ৰাইজৰ অহিত চিন্তা নকৰোঁ’ বুলি কোৱা মুখ্যমন্ত্রীজন বিজেপিৰ ৰাষ্ট্রীয় কার্যনির্বাহকত নিমাতী কইনা হৈ থাকিল বুলিও কয় কৃষক নেতাজনে৷
কৃষক নেতাজনে অগপক মিত্রজোঁটৰ পৰা ওলাই আহিবলৈ দাবী জনাই কয় যে দলটোৰ দুর্বলতাসমূহ বিজেপিৰ দৃষ্টিৰ ধৰা পৰিছে যাৰ বাবে গুৰুত্ব দিয়া নাই৷ নাগৰিকত্ব সংশোধনী বিধেয়কৰ বিৰোধিতা কৰা দলটোৱে মিত্রজোঁটৰ পৰা ওলাই অহাৰ কথা ক’ব পৰা নাই৷ অগপৰ লগতে বি পি এফকো মিত্রতাৰ পৰা ওলাই আহিবলৈ আহবান জনায় কৃষক নেতাজনে৷
বিজেপিৰ ৰাজ্যিক সভাপতি ৰণজিৎ দাসক সমালোচনা কৰি কৃষক নেতাজনে কয় যে বিজেপিৰ সভাপতিজনে অসমীয়া জাতিৰ বিৰুদ্ধে আৰম্ভণিৰ পৰাই কাম কৰি আছে৷ তেওঁ হিন্দু বাংলাদেশীক নাগৰিকত্ব দিয়াৰ ক্ষেত্রত মুখ্য পৃষ্ঠপোষকতা গ্রহণ কৰি আহিছে৷ কৃষক নেতাজনে কয় যে নাগৰিকত্ব সংশোধনী বিধেয়ক কোনো কাৰণতে গৃহীত কৰিবলৈ দিয়া নহ’ব৷ নৰেন্দ্র মোদী, অমিত শ্বাহ, সর্বানন্দ সোণোৱালে অসমীয়া জাতিক নিঃশেষ কৰিব খুজিছে৷ অসমৰ ৰাইজক বিধেয়কখনৰ বিৰুদ্ধে মাৰ বান্ধিবলৈ তেওঁ আহবান জনায়৷
অসম জাতীয়তাবাদী যুৱ-ছাত্র পৰিষদৰ সাধাৰণ সম্পাদক পলাশ চাংমায়ে, মুখ্যমন্ত্রীৰ স্থিতি স্পষ্ট কৰাৰ দাবী জনায়৷ ৰাজ্যৰ স্বার্থত মুখ্যমন্ত্রীক দুমুখীয়া নীতি অৱলম্বন নকৰিবলৈ দাবী জনায়৷ প্রতিবাদকাৰীসকলে মোদী আৰু সোণোৱাল চৰকাৰৰ লগতে বিজেপি, অগপৰ বিৰুদ্ধে বিভিন্ন শ্ল’গানেৰে উত্তাল কৰি তোলাৰ লগতে প্রধানমন্ত্রীলৈ উপায়ুক্তৰ জৰিয়তে স্মাৰক-পত্র প্রেৰণ কৰে৷
