শিৱসাগৰ : অৱশেষত দীর্ঘ প্রতীক্ষাৰ অন্ত পেলাই আদালতত আত্মসমর্পণ কৰিলে গীতাশ্রী খাৰঘৰীয়াই ৷ শিৱসাগৰৰ শিল্পী দম্পতী ৰজনী খাৰঘৰীয়া আৰু ৰুবী খাৰঘৰীয়াৰ আত্মহননৰ বাবে অভিযুক্ত হৈ আছিল বোৱাৰী গীতাশ্রী৷ ইয়াৰ পূর্বে যোৱা ১৯ জুলাইত গুৱাহাটীৰ ছয়মাইলৰ পৰা শিৱসাগৰ আৰক্ষীয়ে গ্রেপ্তাৰ কৰিছিল খাৰঘৰীয়া দম্পতীৰ পুত্র দেৱাশিস খাৰঘৰীয়াক৷ কিন্তু বোৱাৰী তথা শিক্ষয়িত্রী গীতাশ্রীক আৰক্ষীয়ে গ্রেপ্তাৰ কৰিবলৈ সক্ষম হোৱা নাছিল ৷
গোপনে আদালতৰ পৰা আগতীয়া জামিন ল’বলৈ প্রস্তুতি চলাই থকা গীতাশ্রী আৰক্ষীৰ জ্ঞাতসাৰেই শিৱসাগৰতে আত্মীয়ৰ ঘৰত লুকাই থাকিবলৈ সক্ষম হৈছিল৷ কিন্তু একেটা গোচৰতে খাৰঘৰীয়া দম্পতীৰ পুত্র দেৱাশিস জে’ল-হাজোতলৈ যোৱাৰ পৰিপ্রেক্ষিতত গীতাশ্রীৰ আগতীয়া জামিনত অধিবক্তা ব্যর্থ হয়৷ জানিব পৰা মতে, অধিবক্তাই আদালতত আত্মসমর্পণ কৰোৱাই গীতাশ্রীক পোনে পোনে জে’ললৈ প্রেৰণ কৰা বাবেও চেষ্টা কৰিছিল ৷
বিভিন্ন কাৰণত পূর্বৰ অধিবক্তাৰ যোগেদি সেয়া সম্ভৱ নোহোৱাত কিছুদিনৰ পূর্বে গীতাশ্রীৰ পিতৃ আৰু ভগ্নী কাষ চাপে আন এগৰাকী অধিবক্তাৰ৷ উক্ত অধিবক্তাগৰাকীৰ চেষ্টাতে আজি গীতাশ্রীক শিৱসাগৰৰ মুখ্য ন্যায়িক দণ্ডাদীশৰ আদালতত আত্মসমর্পণৰ ব্যৱস্থা কৰা হয় ৷ সুদীর্ঘ ৭৫ দিনৰ মূৰত গীতাশ্রীয়ে আত্মসমর্পণ কৰাৰ কিছু সময়ৰ পিছতে তদন্তকাৰী বিষয়া আদালতত উপস্থিত হৈ অভিযুক্তক নিজৰ জিম্মাত বিচাৰি আৱেদন জনায়৷ আৰক্ষীয়ে সাত দিনৰ জিম্মাত বিচাৰিছিল যদিও আদালতে মাত্র দুদিনৰ বাবেহে আৰক্ষীৰ জিম্মাত দিয়ে৷ ১ জুলাইত শিৱসাগৰ নগৰৰ আছুতীয়া পথত থকা ভাৰাঘৰত উদ্ধাৰ হৈছিল খাৰঘৰীয়া দম্পতীৰ মৃতদেহ ৷
আৰক্ষীৰ তদন্তৰ সময়ত উদ্ধাৰ হৈছিল পাঁচটাকৈ আত্মহত্যাৰ টোকা, যিকেইটা টোকাত ৰজনী খাৰঘৰীয়াই তেওঁলোকৰ আত্মহত্যাৰ বাবে অভিযুক্ত কৰি গৈছিল পুত্র দেৱাশিস আৰু বোৱাৰী গীতাশ্রীক৷ পিছত খাৰঘৰীয়া দম্পতীৰ কনিষ্ঠা কন্যা মণিকাই দেৱাশিস-গীতাশ্রীৰ বিৰুদ্ধে শিৱসাগৰ সদৰ থানাত এক গোচৰ ৰুজু কৰিছিল ৷ তাৰ পিছৰে পৰাই পলাতক অৱস্থাত আছিল দেৱাশিস-গীতাশ্রী৷
আৰক্ষীয়ে শিৱসাগৰকে ধৰি বিভিন্ন জিলাত অভিযান চলাইছিল যদিও সফল হ’ব পৰা নাছিল৷ জানিব পৰা মতে, এগৰাকী অধিবক্তাই দিয়া তথ্যৰ ভিত্তিতহে ১৮ দিনৰ পিছত গুৱাহাটীৰ পৰা দেৱাশিসক গ্রেপ্তাৰ কৰিবলৈ সক্ষম হৈছিল আৰক্ষী ৷ কিন্তু তাৰ পিছতো গীতাশ্রীক আৰক্ষীয়ে গ্রেপ্তাৰ কৰিব নোৱাৰাত বিভিন্ন প্রশ্নৰ উদ্রেক ঘটাইছিল৷ আত্মহনন কৰা ৰজনী খাৰঘৰীয়া আছিল উজনি অসমৰ প্রথমটো ভ্রাম্যমাণ নাট্যদল সম্রাট থিয়েটাৰৰ প্রযোজক ৷ পত্নী ৰুবীও আছিল অভিনেত্রী ৷ এগৰাকী সু-অভিনেতা হিচাপেও পৰিচিত ৰজনী খাৰঘৰীয়া আৰু পত্নী ৰুবী খাৰঘৰীয়াৰ আত্মহননৰ ঘটনাই সমগ্র ৰাজ্যকে জোঁকাৰি গৈছিল৷
