গুৱাহাটী : ৰাষ্ট্রীয় নাগৰিকপঞ্জীৰ লিগেচি ডাটা পৰীক্ষাত এন আৰ চি কর্তৃপক্ষৰ এক বৃহৎ আসোঁৱাহ ৰৈ গ’ল৷ এই কথা উচ্চতম ন্যায়ালয়ত খোদ ৰাজ্যিক সমন্বয়ক প্রতীক হাজেলায়ো স্বীকাৰ কৰিছে৷ এই আসোঁৱাহ সন্দর্ভত উচ্চতম ন্যায়ালয়ত অভিযোগ কৰি লিগেচি ডাটা পুনৰ পৰীক্ষাৰ বাবে আবেদন কৰিবলৈ তথ্যসহ সাজু হৈছে সচেতন নাগৰিক মঞ্চ, অসম নামৰ সংগঠনটো৷
উল্লেখযোগ্য যে ইতিমধ্যে এই সংগঠনটোৱে উচ্চতম ন্যায়ালয়ক ৰাজ্যত এন আৰ চিত বিদেশীৰ নাম অন্তর্ভুক্ত হোৱা কেইবাটাও ঘটনাৰ তথ্য দি চূড়ান্ত খচৰা পুনৰীক্ষণ কৰাৰ আৱেদন কৰিছে৷ উল্লেখযোগ্য যে এন আৰ চিৰ বাবে অতি গুৰুত্বপূর্ণ নথি হিচাপে গণ্য কৰা লিগেচি ডাটা একোজন আবেদনকাৰীৰ বাবে অতি কমেও ৩খনকৈ আছে৷ ককাক আৰু পিতৃৰ লিগেচিৰ উপৰি মাতৃৰ লিগেচিও আৱেদনৰ বাবে গ্রহণযোগ্য৷
কিন্তু আনৰ লিগেচি অন্য লোকে ব্যৱহাৰ কৰাৰ ক্ষেত্রত ধৰা পেলাবৰ বাবে এন আৰ চি কর্তৃপক্ষই কৰা পৰীক্ষণ কেৱল এখন লিগেচিৰ ক্ষেত্রতহে হৈছিল৷ প্রকৃততে আবেদনকাৰীয়ে তিনিখন লিগেচিৰ মাত্র এখন লিগেচিহে ব্যৱহাৰ কৰিছিল৷ সেই লিগেচিখনহে আনে ব্যৱহাৰ কৰিছিল নে নাই সেয়া পৰীক্ষা কৰা হৈছিল৷ কিন্তু যি দুখন ব্যৱহাৰ নকৰা লিগেচি আছিল সেয়া কোনোবাই ব্যৱহাৰ কৰিছিল নেকি তাৰ পৰীক্ষা কৰা নহ’ল৷
এনে লিগেচি ব্যৱহাৰ কৰি বহু লোকে এন আৰ চিৰ চূড়ান্ত খচৰাত নাম অন্তৰ্ভূক্ত কৰাৰ তথ্য পোৱা গৈছে৷ সেয়ে এতিয়া সচেতন নাগৰিক মঞ্চই উচ্চতম ন্যায়ালয়ত ৰৈ যোৱা লিগেচি আনে ব্যৱহাৰ কৰা-নকৰাৰ বিষয়টো পৰীক্ষা কৰিবৰ বাবে আৱেদন কৰিবৰ বাবে প্রস্তুতি চলাই আছে৷ শীঘ্রে সংগঠনটোৱে এক শপতনামাযোগে উচ্চতম ন্যায়ালয়ক তথ্যসহ এই আসোঁৱাহৰ পৰীক্ষণৰ আবেদন কৰিব৷
সংগঠনটোৰ সভাপতি চন্দন ভট্টাচার্যই সদৰী কৰে যে এন আৰ চিৰ লিগেচি পৰীক্ষণৰ সময়ত যিখন লিগেচি আবেদনৰ সৈতে ব্যৱহাৰ কৰা হৈছে, সেইখনহে আন কোনোবাই ব্যৱহাৰ কৰিছে নেকি তাৰ পৰীক্ষা কৰা হৈছিল৷ এনেদৰে ব্যৱহাৰ হোৱা বহু লিগেচিৰ ভুৱা উত্তৰাধিকাৰী পৰীক্ষাত ধৰা পৰে৷ কিন্তু আবেদন নকৰা লিগেচি দুখন আনে ব্যৱহাৰ কৰিছিল নে নাই সেয়া এন আৰ চি কর্তৃপক্ষই পৰীক্ষাই নকৰিলে বুলি তেওঁ সদৰী কৰে৷
এই দুখন লিগেচিও স্বাভাৱিকতে সন্দেহজনক লোকে ব্যৱহাৰ কৰিছিল৷ তেনে কিছু তথ্য লাভ কৰাৰ পাছত উচ্চতম ন্যায়ালয়ৰ দ্বাৰস্থ হ’বলৈ সিদ্ধান্ত লোৱা বুলি তেওঁ সদৰী কৰে৷
