উদ্ধাৰ তিনিখন এটিএম কাৰ্ড, জব্দ মাৰুতি ছুইফট গাড়ী
বৰপেটা : এটিএমৰ ভিতৰত সোমাই আনৰ এটিএম কাৰ্ড কৌশলেৰে সৰকাবলৈ চেষ্টা কৰা প্ৰবঞ্চক দলৰ এজন ধৰা পৰিল ৰাইজৰ হাতত৷ ধৃত প্ৰৱঞ্চকটোৰ ঘৰ হাৰিয়ানাত৷ এই ঘটনা সংঘটিত হৈছে বৰপেটা জিলাৰ হাউলী চহৰত৷ হাউলী চহৰৰ বজাৰৰ ভিতৰত থকা ষ্টেট বেংক অব ইণ্ডিয়াৰ এটিএমৰ পৰা টকা উলিয়াবলৈ সোমাইছিল চহৰৰে কেইবাজনো লোক৷ এই লোকসকলৰ মাজতে সোমাই প্ৰৱঞ্চকটোৱে এজন লোকৰ এটিএম কাৰ্ডখন কৌশলেৰে সৰকাবলৈ চেষ্টা কৰিছিল৷ হিন্দীভাষী যুৱকজনৰ আচৰনত সন্দেহ প্ৰকাশ কৰি এটিএমটোৰ ভিতৰত থকা লোকসকলে লগে লগে আটক কৰে প্ৰৱঞ্চকটোক৷ তাৰ পিচত সোধ-পোচ কৰি হাউলী আৰক্ষীক গতাই দিয়ে ৰাইজে৷ আৰক্ষীৰ জেৰাত আটকাধীন যুৱকজনে হাৰিয়ানৰ মেৱাট জিলাৰ হাকাম আলী বুলি স্বীকাৰোক্তি প্ৰদান কৰে।
আনহাতে আৰক্ষীয়ে যুৱকজনৰ হাতৰ পৰা অইন লোকৰ তিনিখন এটিএম কাৰ্ড আৰু নগদ ৩৮ হাজাৰ টকা উদ্ধাৰ কৰিছে৷ আৰক্ষীয়ে প্ৰৱঞ্চক দলটোৱে ব্যৱহাৰ কৰা এখন মাৰুতি ছুইফট গাড়ীও জব্দ কৰে৷ আৰক্ষীয়ে জব্দ কৰা গাড়ীখনৰ নম্বৰ HR-28-H-2138৷
আৰক্ষীয়ে জনোৱা মতে, হাৰিয়ানাৰ প্ৰৱঞ্চকৰ দলটোৰ বাকী সদস্যসকল পলাই যাবলৈ সক্ষম হয়৷ এই ঘটনাকলৈ হাউলী চহৰত ব্যাপক চাঞ্চল্য বিৰাজ কৰিছে৷
